Әлмәттә каты коммуналь калдыклар буенча VII конференция ачылды
Бүген «КАТЫ КОММУНАЛЬ КАЛДЫКЛАР: ЗАКОННАР ҺӘМ ПРАКТИКА» VII фәнни-гамәли конференциясенә башлангыч бирелде. Чарага тармакның әйдәп баручы экспертлары, федераль һәм төбәк хакимият органнары вәкилләре, төбәк операторлары һәм профильле ассоциацияләр җитәкчеләре җыелды.
Катнашучыларның игътибар үзәгендә – норматив-хокукый базаны камилләштерү, тарифларны җайга салу мәсьәләләре, инфраструктураны үстерү һәм калдыклар белән эш итүнең заманча технологияләрен кертү. Иң яхшы региональ практикалар белән алмашуга һәм тармакның нәтиҗәлелеген арттыру буенча комплекслы карарлар кабул итүгә аерым игътибар бирелә.
Конференциянең беренче көне Әлмәттә, үзенең инновацион алымнары һәм фән белән практиканы тыгыз интеграцияләве белән билгеле булган мәгариф үзәге - Нефть югары мәктәбе базасында уза.
Конференциянең фәнни секциясен үткәрү мәйданчыгы сыйфатында югары нефть мәктәбен сайлау очраклы түгел. Татарстан Республикасы Рәисе Рөстәм Миңнеханов үзенең Юлламасында билгеләп үткәнчә, «Татнефть» компаниясе үзенең фәнни базасын үстерү, перспектив юнәлешләргә – биотехнологияләргә, альтернатив энергия чыганакларына инвестицияләр кертү, кадрлар әзерләү өчен шартлар тудыру (Нефть югары мәктәбе, «Мәктәп биолабораторияләре» проектлары, «Татнефть» тотрыклы үсеш үзәге илчеләре), үз экологик программасын гамәлгә ашыру буенча актив эшне дәвам итә.
Конференциядә катнашучыларга сәламләү сүзе белән
ТР Тарифлар буенча дәүләт комитеты рәисенең беренче урынбасары Лариса Хәбибуллина һәм «Әлмәт дәүләт технология университеты» югары нефть мәктәбе» югары белем бирү дәүләт мәгариф учреждениесенең беренче проректоры Юрий Василенко мөрәҗәгать итеп, калдыклар белән эш итү проблемаларын хәл итүдә фәнни алымның мөһимлеген ассызыкладылар. «Фәннең ККК белән эш итү буенча гамәли эшчәнлеккә интеграциясе экологиягә тискәре йогынтыны киметергә генә түгел, ә циркуляр икътисад технологияләрен үстерү аша икътисадый үсешнең яңа нокталарын да булдырырга мөмкинлек бирә», - дип билгеләде Лариса Хәбибуллина.
Конференция эшендә Россиянең партнер илләре вәкилләре катнаша. Делегатлар арасында – Беларусь Республикасы, Казахстан һәм Кытай Халык Республикасы экспертлары. Чит ил делегацияләренең катнашуы тикшерелә торган мәсьәләләрнең мөһимлеген ассызыклый һәм экология һәм табигатьтән нәтиҗәле файдалану өлкәсендә халыкара хезмәттәшлекне үстерү өчен яңа перспективалар ача.
Барлык актуаль яңалыкларны, докладчыларның презентацияләрен һәм конференциядән фотоматериалларны оператив рәвештә безнең телеграм каналында бастырачакбыз.