Парламент тыңлаулары

Парламент тыңлаулары

Торак-коммуналь өлкәнең торышы бүген халыкны борчый торган иң актуаль мәсьәлә. Халыктан алына торган мөрәҗәгатьләрнең яртысыннан артыгы нәкъ менә шушы өлкәгә кагыла. Бүген әлеге мәсьәлә республика парламентында чираттагы мәртәбә каралды. Парламент тыңлаулары торак-коммуналь хуҗалык өлкәсендә инвестицион мохитне яхшырту буенча РФ Хөкүмәте стратегиясен гамәлгә ашыру чараларына багышланган иде. Парламент тыңлаулары ТР Дәүләт Советы рәисе урынбасары Александр Гусев, Дәүләт Советының икътисад, инвестицияләр, һәм эшкуарлык комитеты рәисе Марат Галиев, төзелеш, архитектура һәм торак-коммуналь хуҗалык министры Ирек Фәйзуллин, ТР Дәүләт Советы депутатлары, ТР Президенты Аппараты, Хөкүмәт, иҗтимагый оешмалар вәкилләре һ.б. катнашында узды.

Парламент тыңлауларын ачып җибәргән икътисад, инвестицияләр һәм эшкуарлык комитеты рәисе Марат Галиев ассызыклавынча, ил күләмендә дә, республикада да соңгы елларда торак-коммуналь хуҗалыкны камилләштерү буенча күп чаралар күрелә, өлкәне реформалаштыруга кагылышлы программалар гамәлгә ашырыла. “Әлеге өлкәне реформалаштыруның уңай нәтиҗәләре күз алдыбызда, аерым алганда, энергия, ресурсларны куллануның нәтиҗәлелеге артты. Шул ук вакытта әле тармакта хәл ителмәгән бихисап проблемалар кала”, - ди Марат Галиев. Шуның берсе коммуналь инфраструктураны яңарту белән бәйләнгән. “Әлеге өлкә зур инвестицияләр таләп итә. Инфраструктураны яңартуны халыктан килә торган түләүләр хисабына гына хәл итеп булмый. Бу катлаулы процесста һәр якның нәтиҗәле хезмәттәшлеге кирәк. Шуңа да дәүләт торак-коммуналь өлкәдән тулысынча китә алмый”, -дип ассызыклады комитет рәисе.