Ярты ел эчендә Казан-Мәскәү юнәлешендәге икекатлы поездлар 250 меңнән артык пассажир ташыган
Казан-Мәскәү маршруты буенча хәрәкәт итүче икекатлы поездлар ярты ел өчен чирек миллионнан артык пассажир ташыган. Беренче рейс 2015 елның 2 июнендә “Казан-1” тимер юл вокзалыннан тантаналы төстә озатып җибәрелгән иде.
Сафка бастырылганнан бирле ноябрь аена кадәр икекатлы 23/24 номерлы поезд белән 253800 пассажир ташылган (2015 елның 18 декабренә кадәр – 293100 пассажир), дип хәбәр итә тимер юл матбугат хезмәте. Чагыштыру өчен: аналогик чорда Мәскәү-Казан юнәлешендәге 1 номерлы фирма поездында 113800 пассажир озатылган (2015 елның 18 декабренә кадәр – 137200 пассажир).
23/24 номерлы поезд көн саен йөреп тора. Мәскәүдән китү вакыты – 23.08, Казанга киләсе көнне 10.45 сәгатьтә килә. Казаннан исә поезд 17.10 сәгатьтә кузгала һәм Мәскәүгә икенче көнне 5.38 сәгатьтә килеп җитә.
Россия территориясендә икекатлы поездлар түбәндәге маршрутлар буенча йөриләр: Мәскәү – Санкт-Петербург, Мәскәү – Адлер, Мәскәү – Воронеж, Мәскәү – Самара.