Спас районына эш визиты: тариф карарларының үтәлешен тикшереп тору
Дәүләт комитеты рәисенең беренче урынбасары Лариса Хәбибуллина ресурслар белән тәэмин итүче оешмаларның тариф карарлары үтәлешен тикшереп тору буенча системалы эш кысаларында Спас районына эш визиты белән килде.
Сәфәр барышында Болгар шәһәрендә заманча чистарту корылмаларына һәм Приволжский бистәсендә су алу корылмасына аерым игътибар бирелде. Ике объект та «Капиталь төзелеш идарәсе» АҖнең «Спас» филиалы карамагында.
Су белән тәэмин итү системасы җир асты чыганакларына нигезләнә, ә кулланучыларга су тармакланган суүткәргечләр челтәре аша китерелә, аларның гомуми озынлыгы 89 километр. Экологик куркынычсызлыкны тәэмин итү өчен агып төшүче сулар 20,9 чакрым озынлыктагы канализация системасы аша чистартыла.
Визит барышында Лариса Хәбибуллина Өчкүл авыл җирлегендә файдаланыла торган «Экосервис» ҖЧҖ каты көнкүреш калдыклары полигонында булды. Калдыкларны утильләштерү процессын оештыруга һәм әйләнә-тирә мохиткә йогынтыны киметү максатларында экологик стандартларны үтәүгә бәя бирелде.
Инспекция шулай ук «Сетевая компания» АҖ филиалы – РЭС оешмасын да колачлады, анда рәиснең беренче урынбасары энергетикларның район кулланучыларын өзлексез электр белән тәэмин итүгә әзерлеген бәяләде.
Гражданнарның агымдагы мөрәҗәгатьләре җирле дәрәҗәдә нәтиҗәле хәл ителә.
«Дәүләт комитеты җитәкчелегенең муниципаль берәмлекләргә даими чыгуы – коммуналь инфраструктура торышының объектив картинасын алу мөмкинлеге ул, – дип билгеләде Лариса Хәбибуллина. – Бары тик урыннардан алынган мәгълүматка ия булып кына, без һәр муниципалитетның реаль ихтыяҗларын исәпкә ала торган нигезле карарлар кабул итә алабыз».