ТР Тарифлар буенча дәүләт комитеты «Бердәм Россия»гә иҗтимагый ярдәм штабы белән берлектә «Җиргә карата саклык белән» күргәзмәсен ачты
Күргәзмә беренче мәртәбә «Каты коммуналь калдыклар: законнар һәм практика» фәнни-гамәли конференциясен уздыру кысаларында күрсәтелде. Әйләнә-тирә мохитне саклауга багышланган сурәтләр сериясен Казан фотографы Марат Ким әзерләгән.
Белешмә өчен: Конференциянең төп темалары булып ККК белән эш итү өлкәсендәге мәсьәләләрне тариф һәм монополиягә каршы көйләү, суд практикасы һәм реформа уздыруның төбәк тәҗрибәсе торды. Экспертлар сыйфатында Монополиягә каршы федераль хезмәт, депутатлар корпусы, РФ башкарма хакимиятенең федераль органнары, фәнни бергәлекләр, ТР башкарма хакимиятенең кызыксынган органнары вәкилләре чыгыш ясады.
«Җиргә карата саклык белән» уртак экофестивале ТР Дәүләт Советы депутатларын, «Бердәм Россия» экологик партпроекты координаторын, коммерциячел булмаган оешмалар вәкилләрен һәм экоактивистларны җыйды.
Экофестиваль кунаклары «Экологик сәясәт һәм мәдәният үзәге» Бөтенроссия иҗтимагый оешмасының төбәк бүлеге оештырган экосумкаларга рәсем ясау буенча мастер-классларда булдылар. Интерактив активлык яратучылар өчен «Бәйге» экологик викторинасы узды, анда катнашучылар экология һәм калдыкларны эшкәртү өлкәсендәге белемнәрен тикшерделәр. Экофестиваль азагында катнашучылар К.Фукс исемендәге скверда кошлар өчен эко-җимлекләр элеп чыктылар.
Мәйданчыкта шулай ук икенчел чимал кабул итү пункты да эшләде: җыюга һәм тапшыруга чиста ПЭТ-шешәләр, эшкәртелгән батареялар, картон һәм кәгазь китерделәр.
Өстәмә рәвештә экспертлар белән «Экология – үсеш векторы» темасына онлайн-трансляция узды, анда заманча экологик технологияләр һәм әйләнә-тирә мохитне саклауга якын килү, яңартыла торган энергетика мәсьәләләре, экологиягә тупланган зыянны бетерү, йомык җитештерү цикллары һәм экологик биотехнологияләр турында фикер алыштылар.
Трансляция штаб һәм ТР Тарифлар буенча дәүләт комитеты битендә бастырылган: https://vk.com/shtab.er_16
Чара шулай ук «Экология» илкүләм проектына багышланган иде. Әйләнә-тирә мохитне саклауга юнәлдерелгән илкүләм проект буенча эш түбәндәге юнәлешләр буенча алып барыла: калдыкларны утильләштерү һәм эшкәртү, чүплекләрне бетерү, урманнарны һәм сулыкларны саклау, атмосферага чыгарыла торган матдәләрне киметү, экологик туризмны һәм экологик тәрбияне үстерү, биологик төрлелекне саклау. «Экология» илкүләм проектының мөһим юнәлеше — илдә калдыклар белән эш итүнең бөтен системасын үзгәртү. 2030 елга кадәр илдә чүп-чарны 100% ка сортларга аеру тәэмин ителәчәк, ә полигоннарга җибәрелә торган калдыклар күләме ике тапкырга кимиячәк. Каты көнкүреш калдыкларының өчтән береннән артыгы эшкәртүгә җибәрелергә тиеш. Бөтен ил буйлап каты көнкүреш калдыкларыннан кыйммәтле чимал җитештерә торган махсус комплекслар барлыкка киләчәк, аларның куәте ел саен 37,1 млн тоннадан артык булачак. Кайбер төр чималны җиде тапкырга кадәр эшкәртергә мөмкин!
«Каты коммуналь калдыклар белән эш итүнең комплекслы системасын формалаштыру» федераль проекты ярдәмендә Россиядә калдыкларны аерым җыюның ике агымлы системасы кертелә, димәк, сезнең ишегалдында бары тик бер өстәмә контейнер барлыкка киләчәк, аңа барлык икенчел чималны салырга мөмкин — иң мөһиме, ул коры һәм чиста булырга тиеш.