Ярты ел эчендә Татарстанда коммуналь һәм энергетика инфраструктурасын 10,6 млрд сумнан артыкка модернизацияләгәннәр
2026 елның беренче яртыеллыгында Татарстанда коммуналь һәм энергетика инфраструктурасын модернизацияләү буенча 10,6 млрд сумлык чаралар башкарылган. Бу хакта ТР Тарифлар буенча дәүләт комитеты матбугат хезмәте хәбәр итә. Ведомство тарафыннан җайга салынучы оешмалар быел 77 инвестиция программасын гамәлгә ашыра – үткән ел белән чагыштырганда 15% ка күбрәк. Программаларны финанслауның гомуми күләме 29,667 млрд сум тәшкил итә.
Акчалар инженерлык челтәрләрен төзүгә һәм реконструкцияләүгә, җиһазларны яңартуга һәм коммуналь һәм энергетика инфраструктурасының яңа объектларын төзүгә тотыла.
Ярты елда башкарылган эшләрнең төп өлеше җылылык белән тәэмин итү өлкәсенә туры килә – 3,15 млрд сум. Алты айда 30 км дан артык җылылык челтәре төзелде һәм яңартылды, 33 берәмлек җиһаз алыштырылды.
Электр энергетикасы өлкәсендә 54 меңнән артык шәхси исәпләү приборы урнаштырылган. Су белән тәэмин итү һәм ташландык суларны агызу системаларында 5 км дан артык челтәр реконструкцияләнгән. Калдыкларны эшкәртү һәм сортларга аеруның яңа объектларын төзү дәвам итә.
2026 елның 1 сентябреннән ТР Тарифлар буенча дәүләт комитетына җылылык белән тәэмин итү өлкәсендә инвестиция программаларының үтәлешен контрольдә тоту буенча өстәмә вәкаләтләр бирелә. Бу планлаштырылган чараларны факттагы нәтиҗәләр белән чагыштырырга һәм аларның үтәлешен тикшереп торырга мөмкинлек бирәчәк.
«Инфраструктураны модернизацияләүгә тарифта каралган һәр сум конкрет нәтиҗә бирергә тиеш – яңа челтәрләр, заманча җиһазлар, коммуналь хезмәтләрнең ышанычлылыгын арттыру. Безнең бурыч – акчаларның чыннан да объектларга барып җитүен һәм халыкка хезмәт күрсәтүнең сыйфатын яхшырту өчен эшләвен тәэмин итү», – дип билгеләп үтте Татарстан Республикасы Тарифлар буенча дәүләт комитеты рәисе урынбасары Дмитрий Сапожников.
Гамәлгә ашырыла торган чаралар «Яшәү өчен инфраструктура» милли проектының максатларына туры килә, ул коммуналь хезмәтләрнең сыйфатын һәм һәркем файдалана алырлык булуын яхшыртуга, инфраструктураның тузуын киметүгә һәм аның ышанычлылыгын арттыруга юнәлдерелгән. Татарстан алдына 2030 елга ел саен коммуналь челтәрләрнең кимендә 2,5% ын яңарту бурычы куелган.
Белешмә: Җылылык белән тәэмин итү өлкәсендә инвестиция программаларын 13 оешма, су белән тәэмин итү өлкәсендә – 23 оешма, су агызу өлкәсендә – 16 оешма гамәлгә ашыра. Каты коммуналь калдыклар белән эш итү өлкәсендә инвестиция программаларын – 2 оешма, электр энергетикасында – 11 оешма гамәлгә ашыра.