Энергетика җиһазларын җитештерүне ТР Тарифлар буенча дәүләт комитеты белгечләре өйрәнде
Тарифлар буенча Татарстан Республикасы дәүләт комитеты белгечләре «Искра-Идел» технопаркында булдылар, анда электр энергетикасы өчен җиһазлар җитештерү белән таныштылар. Предприятиеләргә эш визитлары регуляторга җитештерү процессларын һәм тарифлар билгеләгәндә исәпкә алына торган чыгымнарны формалаштыру үзенчәлекләрен яхшырак аңларга ярдәм итә.
Технопарк энергетика тармагы өчен җиһазлар эшләүне, җитештерүне һәм сынауларны берләштерә. Җитештерү корпусларының мәйданы 44 мең кв. метр тәшкил итә, территориядә 1 меңгә якын белгеч эшли.
Визит барышында Дәүләт комитеты хезмәткәрләре җитештерү мәйданчыкларын карадылар һәм резидент предприятиеләрнең эше белән таныштылар. Чыгарыла торган продукция арасында - интеллектуаль исәпкә алу приборлары, кабель арматурасы, электр калканы җиһазлары, трансформатор подстанцияләре, реклоузерлар һәм энергетика өчен башка җиһазлар.
«Безнең өчен исәпләүләрдә күрсәтелгән күрсәткечләрне генә түгел, ә аларның гамәлдә ничек формалашуын да аңлау мөһим. Җитештерү мәйданчыкларында булу технологик процессларны, кулланыла торган җиһазларны һәм чыгымнарны тирәнрәк аңларга мөмкинлек бирә. Бу тарифлар билгеләгәндә бирелә торган материалларга объектив бәя бирергә ярдәм итә», - дип билгеләп үтте ТР Тарифлар буенча дәүләт комитеты рәисенең беренче урынбасары Лариса Хәбибуллина.
Белгечләр фәнни-тикшеренү сынау үзәге эше белән аерым таныштылар. Биредә 0,4 кВ дан 500 кВ га кадәр көчәнеш класслары энергетикасы өчен җиһазларны тикшерәләр, диагностикалыйлар һәм сыныйлар. Үзәк фәнни тикшеренүләрне, конструкторлык эшләнмәләрен һәм җиһазларны тикшерүне берләштерә.
Предприятиеләргә бару дәүләт комитеты белгечләренә тармак эше турында практик күзаллау алырга һәм тарифларны җайга салу бурычларын үтәгәндә әлеге мәгълүматны исәпкә алырга мөмкинлек бирә.