Дмитрий Сапожников Кукмара районына эш визиты белән килде
Татарстан Республикасы Тарифлар буенча дәүләт комитеты рәисе урынбасары Дмитрий Сапожников эш визиты белән Кукмара муниципаль районында булды. Сәфәрнең максаты – тарифларны җайга салуның актуаль мәсьәләләре һәм җирле коммуналь инфраструктура торышын бәяләү.
Программаның беренче пункты Кукмара шәһәренең чистарту корылмаларын карау булды. Башкарма комитет җитәкчесе урынбасары Нияз Ризванов катнашында узган очрашуда объект эшчәнлегенең төп аспектлары, шул исәптән җиһазларның агымдагы торышы, технологик тоташтыру проблемалары һәм районның коммуналь хуҗалыгын үстерүнең перспектив планнары каралды.
Аннары делегация каты көнкүреш калдыклары полигонына һәм С.Разин урамындагы су алу станциясенә юнәлде. Үткәрелгән мониторинг объектлар эшенең нәтиҗәлелеген бәяләргә һәм аларны алга таба модернизацияләү мөмкинлекләре турында фикер алышырга мөмкинлек бирде. Фикер алышуның мөһим темасы булып экологик куркынычсызлык һәм коммуналь хезмәтләр эшчәнлеген оптимальләштерү торды.
Коммуналь инфраструктура объектларын мониторинглау нәтиҗәләрен Дәүләт комитеты экспертлары 2025 елга тариф карарларын эшләгәндә файдаланачак. Мондый алым һәр торак пунктның үзенчәлекләрен исәпкә алырга мөмкинлек бирәчәк һәм төбәктә торак-коммуналь хуҗалык өлкәсен баланслы үстерүне тәэмин итәчәк.