«Җиңү энергиясе: Казан форумы энергетиканың үткәнен һәм киләчәген берләштерә»
Бүген «Казан Экспо» мәйданчыгында узган Казан халыкара энергетика форумы тәмамланды. Форум кысаларында «KAZANENERGYEXPO» махсуслаштырылган энергетика күргәзмәсе оештырылды, ул «ЭНЕРГОПРОМ-2025» чарасының мөһим өлешенә әверелде.
Татарстан Республикасы Тарифлар буенча дәүләт комитеты рәисенең беренче урынбасары Лариса Хәбибуллина энергетика тармагының Бөек Җиңүгә керткән зур өлешенә багышланган «Ике тапкыр җиңүчеләр» экспозициясендә булды. Күргәзмә кунакларга җиңүгә ирешүдә төп роль уйнаган энергетика объектлары белән танышырга мөмкинлек бирде.
Татарстан Республикасы Рәисе форумны уздыруның мөһимлеген ассызыклады һәм аның алга таба федераль статусына ышаныч белдерде: «Форум гомумфедераль әһәмияткә ия булачак, Россия энергетика министры оештыру комитетын җитәкләячәк, ә без ярдәм күрсәтәчәкбез. Мондый мәйданчык Россия өчен бүген бик кирәк».
Шулай ук Татарстан Рәисе Рөстәм Миңнеханов Бөек Ватан сугышыннан соң энергетика үсешенә багышланган күргәзмәнең әһәмиятен билгеләп үтте: «Бөек Ватан сугышыннан соң энергетиканың ничек үсүе турында бик яхшы күргәзмә ясадык. Мондый катлаулы вакытта безнең ил шуның аркасында аякка басты. СССРның энергетика системасы ярдәмендә Россия үзенең хәзерге хәленә иреште». Күргәзмәне караганнан соң, Рәис оештыручыларга рәхмәт белдерде һәм барлык килүчеләрне экспозиция белән танышырга чакырды.
Шунысын да билгеләп үтәргә кирәк, 2025 ел Бөек Ватан сугышында Җиңүнең 80 еллыгын бәйрәм итү елы дип игълан ителде, бу ул елларның тарихы һәм казанышлары белән бәйле барлык чараларга аерым әһәмият бирә.
Форум актуаль мәсьәләләр буенча фикер алышу һәм тәҗрибә уртаклашу өчен экспертларны һәм энергетика өлкәсендәге белгечләрне берләштергән мөһим вакыйгага әверелде.