Дмитрий Сапожников эш визиты белән Питрәч районында булды
Бүген ТР Тарифлар буенча дәүләт комитеты рәисе урынбасары Дмитрий Сапожников республиканың Питрәч муниципаль районына эш сәфәре барышында коммуналь инфраструктура объектларында булды. Сәфәрдә аны район башкарма комитеты җитәкчесе Илназ Дәүләтханов һәм җайга салынулы оешма җитәкчеләре озата йөрде.
Аерым алганда, Дмитрий Сапожников Кощаково, Питрәч һәм Царево торак пунктларында биологик чистарту корылмаларында булды. Яңа биологик чистарту корылмалары «Экология» илкүләм проектының «Иделне савыктыру» программасы буенча федераль бюджет хисабына техник яктан искергән биналар урынына төзелгән.
Илкүләм проект Россия Президенты Владимир Путин инициативасы белән илнең иң эре елгаларының берсенең хәлен яхшыртуга юнәлдерелгән, шул исәптән елгага агызыла торган пычранган агынты суларның өлешен киметү юлы белән дә.
Объектларда предприятиеләр эшчәнлегенең проблемалы мәсьәләләре һәм торак пунктларда үзәкләштерелгән су агызу челтәрләрен алга таба үстерү перспективалары турында фикер алыштылар.
Каралган чистарту корылмаларын «Питрәч коммуналь челтәрләре» МУП файдалана. Элегрәк без бу предприятие турында үзебезнең «Җайга салучы җайга салынучылар турында» рубрикасында язган идек.
Моннан тыш, Питрәч районына сәфәр кысаларында «Газпром трансгаз Казан» ҖЧҖ, подряд оешмалары вәкилләре һәм авыл җирлекләре башлыклары белән районда газны халык участокларына бушлай китерү мөмкинлеге бирә торган социаль догазификация программасын гамәлгә ашыруның барышы турында киңәшмә үткәрелде.
Гражданнарны кабул иткәндә Дмитрий Сапожников питрәчлеләрнең суга тарифларның ничек формалашуы һәм "тарифлар" белән "коммуналь хезмәтләр өчен түләүләр" арасында нинди аерма булуы турындагы сорауларына җавап бирде. Бер ханым мөрәҗәгать иткән проблемалы сорауларның берсен кабул итү вакытында ук хәл итәргә мөмкин булды. Тикшерү нәтиҗәсендә техник хата бетерелде һәм кулланылган су өчен түләүләр төзәтелде.
Исегезгә төшерәбез, ТР Тарифлар буенча дәүләт комитеты җитәкчелеге республика муниципаль районнарында гражданнарны даими нигездә кабул итә. Чираттагы күчмә кабул итү 4 мартта Биектау районында була.