Дәүләт комитеты тарафыннан «Водоканал» МУП инвестиция программасы үтәлешенә күчмә мониторинг үткәрелде
ТР Тарифлар буенча дәүләт комитеты экспертлары Казан шәһәренең «Водоканал» МУП су белән тәэмин итү өлкәсендә инвестиция программасы үтәлешенә чираттагы мониторинг үткәрделәр һәм түбәндәге объектларны реконструкцияләү буенча эшләр барышы белән таныштылар:
1. Мирный су корылмасыннан алып Черноозерская/Рубежная урамына кадәр, Черноозерская урамыннан Рощинская урамына кадәр суүткәргеч участогын реконструкцияләү.
Подрядчы – «Тышкы инженерлык челтәрләре» ҖЧҖ. Инженерлык эзләнүләре башкарылган, проект эшләнгән. Смета бәясенең дөреслеге буенча проект документациясенә дәүләт экспертизасының уңай нәтиҗәсе алынган. 900 м участокта ГНБ ысулы белән диаметры 700 мм булган 443 м полиэтилен торба салынган һәм футлярлар өчен сынау бораулавы үткәрелгән. Хәзерге вакытта Матюшино тракты буйлап эшләр алып барыла, анда диаметры 700 мм булган яңа торба диаметры 1000 мм булган торбадан ясалган футлярга кертеләчәк. ГНБ-җайланманы тотып тору өчен бетон нигез әзерләнә, ул сынау уемын этаплап киңәйтәчәк һәм аңа футлярны, ә аннары төп торбаны да кертәчәк. Тарттырып бару һәм бораулау комлы туфрак булуы белән катлаулана, шуңа күрә бетонит кулланыла, ул суда эри һәм бораулау очлыгына бирелә. Төп суүткәргеч салынгач, 14 кое һәм камера төзү эшләре башланачак, аларга кулланучылар тоташтырылачак. Ел саен бу участокта 15 авария булып, суүткәргеч өзелгәләгән. Әзерлек – 40%. Объектны тапшыру вакыты: 2024 елның 30 марты.
2. Рубежная урамындагы суүткәргеч участогын реконструкцияләү. Озынлыгы – 1280 м, диаметры – 150 мм. Подрядчы – «Тышкы инженерлык челтәрләре» ҖЧҖ. Инженерлык эзләнүләре башкарылган. Проект эшләнгән. Смета бәясенең дөреслеге буенча проект документациясенә дәүләт экспертизасының уңай нәтиҗәсе алынган. Бүгенге көндә ГНБ ысулы белән диаметры 160 мм булган 700 м полиэтилен торба салынган. Объектның әзерлек дәрәҗәсе – 50%. Объектны тапшыру вакыты: 2024 елның 30 марты.
Җайга салу органы оешманың инвестиция проектларын гамәлгә ашыру срокларын үтәвенең мөһимлеген билгеләп үтте.