Татарстанда «Цифрлы икътисад» илкүләм проекты гамәлгә ашырыла
Икътисадта һәм социаль өлкәдә цифрлы технологияләрне тиз арада кертүне тәэмин итү максатыннан, Россия Федерациясе Хөкүмәте тарафыннан 2019-2024 еллар чорына «Россия Федерациясенең цифрлы икътисады» илкүләм программасы формалаштырылды. Аны гамәлгә ашыру югары технологияле бизнес өчен шартлар тудырачак, илнең конкурентлыкка сәләтлелеген арттырачак, илкүләм иминлекне ныгытачак һәм халыкның тормыш сыйфатын яхшыртачак.
Программа составына 9 федераль проект керә, шуларның берсе булып «Мәгълүмати куркынычсызлык» тора:
- Цифрлы киңлек иминлеген тәэмин итү, гражданнарның шәхси мәгълүматларын саклау, кибер куркынычлардан саклау.
- 400 дәүләт мәгълүмат системасын мәгълүмат таралудан һәм хакерлык тәэсиреннән саклануны тикшерәчәкләр, дәүләт органнары сайтларын имитацияләгән фишинг сайтларын блоклау механизмы камилләштереләчәк.
- Кибер куркынычсызлык белгечләре шикле сайтларның эшен күзәтәчәк һәм онлайн-мошенниклыкны кисәтәчәк, мобиль кушымталарны куркынычсызлык өчен тикшерү сервисы эшли башлаячак, телефон мошенниклыгына каршы мәгълүмат системасы булдырылачак.
- Икътисадның төрле тармакларыннан белгечләрне практик укыту өчен илкүләм киберполигон предприятиеләрнең бизнес-процессларын имитацияләүче платформа эшли башлаячак.
Цифрлы киңлекнең мәгълүмати куркынычсызлыгын тәэмин итү максатыннан ТР Тарифлар буенча дәүләт комитетында хезмәткәрләр укыту узды. Мәгълүмати-техник хезмәт күрсәтү бүлеге Дәүләт комитеты хезмәткәрләрен график буенча укыту өчен лекцияләр циклы әзерләде һәм лекцияләр тәмамланганнан соң тест үткәрелде.