Каты коммуналь калдыклар өлкәсендә чик тарифлар турында мәгълүматны ачу срокларын бозу нинди нәтиҗәләргә китерә
Татарстан Республикасы Арбитраж суды «Торак хуҗалыгы һәм төзекләндерү күп тармаклы җитештерү берләшмәсе» ҖЧҖ («МПО ЖХ и Б» ҖЧҖ) Административ хокук бозулар турында РФ кодексының 19.8.1 ст. буенча административ җаваплылыкка тартуның законлылыгын раслады.
Оешмага карата административ эш Татарстан Республикасының Тарифлар буенча дәүләт комитеты тарафыннан каты коммуналь калдыклар белән эш итү өлкәсендә чик тарифлар турында мәгълүматны ачу срокларын бозу нәтиҗәсендә ачылган иде.
1998 елның 24 июнендәге 89-ФЗ номерлы федераль законның 24.11 ст. ярашлы рәвештә, каты коммуналь калдыклар белән эш итү өлкәсендәге мәгълүмат, дәүләт, коммерция һәм закон белән саклана торган башка серне тәшкил итүче мәгълүматтан тыш, һәркемгә ачык булырга тиеш. Каты коммуналь калдыклар белән эш итү өлкәсендә эшчәнлекнең көйләнә торган төрләре турында мәгълүмат коммерция сере түгел һәм мәгълүматны ачу стандартларына ярашлы рәвештә ачык рәвештә урнаштырылырга тиеш.
Ачыкланган мәгълүматта каты коммуналь калдыкларны эшкәртү, зарарсызландыру һәм күмү буенча хезмәтләргә расланган чик тарифлар турында мәгълүматлар, шулай ук каты коммуналь калдыклар белән эш итү буенча төбәк операторы хезмәтенә бердәм тариф булырга тиеш.
РФ Хөкүмәтенең 21.06.2016 № 564 карарына ярашлы рәвештә, мәгълүмат «Федераль җайга салу органы – региональ җайга салу органнары – җайга салу субъектлары» бердәм мәгълүмати-аналитик системада тарифлар билгеләү турында карар кабул ителгән көннән алып 30 календарь көннән дә соңга калмыйча урнаштыру юлы белән ачыла.
«МПО ЖХ и Б» ҖЧҖ очрагында мәгълүматны урнаштыру вакыты бозылган.
Административ хокук бозулар турында РФ кодексының 19.8.1 ст. үз эшчәнлеге турында мәгълүмат бирмәгән яки алдан ук ялган мәгълүмат биргән яки мәгълүматны ачу стандартларында билгеләнгән тәртипне, ысулны яки срокларны һәм аның формаларын бозган өчен административ җаваплылык каралган.