Каты коммуналь калдыклар штабы: графикта калдыклар чыгару ешлыгын киметергә ярамый

Бүген видеоконференция режимында Татарстан Республикасы Тарифлар буенча дәүләт комитетының каты коммуналь калдыклар белән эш итү өлкәсендә төбәк операторлары эшчәнлеген карау буенча эшче штаб утырышы булды.

«Халык контроле» Татарстан дәүләт мәгълүмат системасына алынган мөрәҗәгатьләргә ясалган анализ республиканың кайбер районнарында янә чүп-чарны вакытында чыгаруда катлаулы вәзгыять булуын күрсәткән.

Чүп-чарны вакытында чыгармау турында иң күп шикаятьләр Казан, Яр Чаллы һәм Түбән Кама муниципаль районнарында яшәүчеләрдән килә. Узган атнадагы 30 мөрәҗәгатьнең 4се буенча карау сроклары бозылган. Шунысын да билгеләп үтәргә кирәк, каты коммуналь калдыклар белән эш итү мәсьәләсе буенча халыкның шикаятьләре даими рәвештә штаб утырышының фикер алышу предметына әйләнә. Хәбәрләргә оператив җавап бирүдә уңай динамикага карамастан, халыкны өстәмә контейнерлар урнаштыру, контейнер мәйданчыкларын төзекләндерү һәм әлеге ресурста белдерелә торган каты коммуналь калдыкларны чыгару графигын үтәмәү мәсьәләләре борчый.

Штаб рәисе Лариса Хәбибуллина төбәк операторларына чүп чыгару ешлыгын киметмәскә, ә СанПин буенча күрсәтелгән графикны калдырырга тәкъдим итте:

«Җәйге чор узып китсә дә, чүп чыгару ешлыгын киметергә ярамый. Графиклар яңадан каралырга тиеш түгел, авыл торак пунктларында чүп тотрыклы рәвештә атнага бер тапкыр чыгарылырга!» – дип билгеләде Лариса Хәбибуллина.

Быел «Халык контроле» ДМС системасына 668 мөрәҗәгать килгән, шуларның 624 – хәл ителгән, 17 – эштә. «Мотивлаштырылган баш тарту» статусы 20 мөрәҗәгатькә бирелгән, 7 буенча эшләр планлаштырылган.